ఈ లోకపు లెక్కల కన్నా
పరలోక గ్రంథాలతోనే వాళ్ళకు పరిచయం ఎక్కువ
అయినా...
మరణం తర్వాత ఏముంటుందని
ఇక వాళ్ళడుగరు
ఇప్పుడు వాళ్ళను ఆక్రమించిన ప్రశ్న వేరు:
మరణానికి ముందు మనమేం చేయాలి?
వాళ్ళంటారు-
జీవితానికి దగ్గరగా జీవిద్దాం
దురాక్రమణ వ్యాపార దేవుళ్ళు
ఎడారిలో బతుకులను విభజిస్తున్నట్లుగా బతకలేం
మేం పురాతన ధూళి పక్కన జీవిస్తాం
మా జీవితాలు
చరిత్రకారుని రాత్రులపై మోయలేని బరువు :
"నేనెంత తుడిచి పెట్టినా
అదృశ్యం నుండి వాళ్లు తిరిగి ఊపిరి పోసుకుంటారు"
మా జీవితాలు చిత్రకారుని కుంచెపై గీయలేని బరువు :
"వాళ్లను గీస్తూ గీస్తూ వాళ్ళ జీవితాల పొగమంచులో నేనూ కలిసిపోతాను"
మా జీవితాలు ఆర్మీ జనరల్ మనసుపై
అసహనమంత బరువు :
"చచ్చినవారి ఆత్మలు
నెత్తురోడుతూ
ఎలా ఇంకా నన్ను చుట్టుముడుతాయి? "
వాళ్ళంటారు-
మాకు నచ్చినట్లు మా జీవితాలను శ్వాసిస్తాం
మరణించినా పునరుజ్జీవించేలా
ఇప్పుడు మాకో బతుకు ముక్క కావాలి
వాళ్ళు యధాలాపంగా
తాత్వికుని వాక్యాలు పలుకుతారు :
"మరణం మమల్ని ఏం చేయలేదు
మేము ఉన్నామంటే
అదిక్కడ లేదు
మరణం మమ్మల్ని ఏం చేయలేదు
అదున్న చోట మేము లేము"
ఆ తర్వాత -
వాళ్ళు కలలకు కాళ్ళూ చేతులూ గీసారు
కాళ్ళపై నిలబడే నిద్రపోతున్నారు!
మూలం:(And They Don't Ask...)
- - - - - - - - మహమూద్ దర్వీష్
స్వేచ్ఛానువాదం
మహమూద్ దర్విష్
పాలస్తీనా జాతీయ కవిగా గౌరవించబడే మహమూద్ దర్విష్ మార్చి 13, 1941 లో జన్మించారు. ప్రస్తుత ఇజ్రాయెల్కు ఏర్పాటు కోసం జియోనిస్ట్ మిలీషియాలచే తమ మాతృభూమిని కోల్పోయిన పాలస్తీనియన్లలో అతని కుటుంబం కూడా ఉంది .ఆ తర్వాత అతని కుటుంబం లెబనాన్కు పారిపోయింది. జీవితంలోని ఎక్కువ భాగం ప్రవాసంలో మగ్గిపోయిన అతనికి పాలస్తీనా తల్లి, పాలస్తీనా ఒక ప్రేయసి, నెరవేరని స్వేచ్ఛా వాంఛ.దాదాపు శతాబ్ద కాలంగా ఇజ్రాయెల్ ఆక్రమణలో ఉన్న శరణార్థులుగా జీవిస్తున్న పాలస్తీనియన్ల బాధలకు ఆయన కవిత్వం గొంతు నిచ్చింది .దర్విష్ 2008 ఆగస్టు 9న హ్యూస్టన్లో గుండె శస్త్ర చికిత్సకు సంబంధించిన సమస్యలతో మరణించారు. దర్విష్ దాదాపు ముప్పై కవితా సంపుటాలను ప్రచురించాడు, ఇవి ఇరవై రెండు కంటే ఎక్కువ భాషలలోకి అనువదించబడ్డాయి.అందులోంచి కొన్ని తెలుగులో స్వేచ్ఛానువాదంగా ఉదయిని పాఠకుల కోసం...
రహీమొద్దీన్
కవి రహీమొద్దీన్ ప్రభుత్వ ఉపాధ్యాయులు, మహబూబాబాద్ నివాసి. డిగ్రీ నాటి నుండి కవిత్వం రాస్తున్నారు. 2018 నుంచి రైటింగ్ ని సీరియస్ గా తీసుకున్నారు. 2023 లో 'కలల రంగు' కవిత్వ సంపుటి వెలువరించారు. పలు కవిత్వ సమీక్షలూ చేశారు.
-
రహీమొద్దీన్#molongui-disabled-link
-
రహీమొద్దీన్#molongui-disabled-link
-
రహీమొద్దీన్#molongui-disabled-link
-
రహీమొద్దీన్#molongui-disabled-link
