తుపాకులు మొరగడం ఆగిపోతుంది
యుద్ధ విరమణ జరిగిపోతుంది
నాయకులు కరచాలనం చేసుకుంటారు
శాంతి ముసుగు చాటున
రక్త పు కోరలు కప్పబడతాయి
శిథిల నగరం మీద
పొద్దుపొడుపు..
ముసలి తల్లి మాత్రం
అమరుడైన తన కొడుకు కోసం
ఎదురు చూస్తుంటుంది
అక్కడ ఒక అమ్మాయి
తన ప్రియమైన భర్త కోసం
గాబరా పడుతుంటది
బిక్క ముఖాలు వేసుకున్న పిల్లలు
సగం తెగిన చందమామలు
యోధుడైన తండ్రి కోసం
ఎదురు చూస్తుంటారు
నా దేశాన్ని అమ్మిన వారెవరో
తెలవదు
కానీ ధర మాత్రం
ఎవరు చెల్లించారో చూశాను..
**
మూలం..మహమ్మద్ ధర్వేష్
మహమూద్ దర్విష్
పాలస్తీనా జాతీయ కవిగా గౌరవించబడే మహమూద్ దర్విష్ మార్చి 13, 1941 లో జన్మించారు. ప్రస్తుత ఇజ్రాయెల్కు ఏర్పాటు కోసం జియోనిస్ట్ మిలీషియాలచే తమ మాతృభూమిని కోల్పోయిన పాలస్తీనియన్లలో అతని కుటుంబం కూడా ఉంది .ఆ తర్వాత అతని కుటుంబం లెబనాన్కు పారిపోయింది. జీవితంలోని ఎక్కువ భాగం ప్రవాసంలో మగ్గిపోయిన అతనికి పాలస్తీనా తల్లి, పాలస్తీనా ఒక ప్రేయసి, నెరవేరని స్వేచ్ఛా వాంఛ.దాదాపు శతాబ్ద కాలంగా ఇజ్రాయెల్ ఆక్రమణలో ఉన్న శరణార్థులుగా జీవిస్తున్న పాలస్తీనియన్ల బాధలకు ఆయన కవిత్వం గొంతు నిచ్చింది .దర్విష్ 2008 ఆగస్టు 9న హ్యూస్టన్లో గుండె శస్త్ర చికిత్సకు సంబంధించిన సమస్యలతో మరణించారు. దర్విష్ దాదాపు ముప్పై కవితా సంపుటాలను ప్రచురించాడు, ఇవి ఇరవై రెండు కంటే ఎక్కువ భాషలలోకి అనువదించబడ్డాయి.అందులోంచి కొన్ని తెలుగులో స్వేచ్ఛానువాదంగా ఉదయిని పాఠకుల కోసం...
