మనసు ఊటలో
వికసించే భావాల పూదోట మాట
విలువైనవన్నీ అమ్మమ్మ ట్రంకు పెట్టెలో భద్రంగా దాచుకున్నట్లు
మాటలు దాచేయమని హెచ్చరించే మెదడు
సంజ్ఞలన్నీ కొట్టిపారేయమని గోల చేసే నాలుక
ఏదైతేనేమి
దశాబ్దాల ప్రకంపన
అవతలి వారికి కానరాని సరికొత్త రూపం
ఏళ్ళుగా మేటలుగా పేరుకుపోయిన మాటలు
నిశ్శబ్దానికి నిద్రాభంగం చేసిన ప్రవాహాలు
ఆది ఏదో అంతమేదో
తుది ఏదో మొదలు ఏదో
గూడు వదిలిన పక్షుల్లా
రెక్కలల్లాడిస్తూ ఎగిరిపోయిన
మాటల తూటాలు
ఎక్కడివీ తూణీరాలు
పెదవికి పెదవి ఆనకుండా
అలసటే ఎరుగకుండా
మెలికల గిరిక అలుపెరుగని యోధలా తిరుగుతూనే ఉంది
అమ్మమ్మ కాలం ట్రంకు పెట్టె
అమ్మ అయినా తెరవ లేదేమి
తెరుచుకోలేని కవాటాలో
తెరవనీయని ఝంజాటాలో
వెనక్కు లాగి ఉంటాయి
ఇదుగో
అలా
తరతరాలుగా పేరుకుందీ బరువు
భుజాలకు వేళ్ళాడుతూ అడుగు ముందుకు వేయనీయని పరువుల బరువు
పాపం
వారసత్వ బరువు
మోయలేక చతికిలపడిందేమో ధైర్యంకన్నా ముందు పుట్టిన అమ్మ
నాకిక
కాలంతోపాటు కలలుగా
బండరాయి కన్నా పదింతలుగా
నా దాకా నడిచొచ్చిందా మర్యాదల బరువు
బిడ్డల దాకా దాచి భరించలేని బరువైన పెట్టెను
నేనే తెరిచానిక
తెరవగానే
ఏళ్ళుగా గంధపు చెక్కలై దాగి ఉన్న మాటలు
అత్తరు గుబాళింపులై పరివ్యాప్తమయ్యాయి
పొరలు పొరలుగా భాషల ముడతలు
దులిపేస్తున్నా కొద్దీ
రంగు రంగుల సీతాకోక చిలుకలు
ఏడు రంగుల స్వప్నాలై
ఎగిరిపోతుంటే
హృదయాంతరాలలో ఊపిరాడుతున్న అనుభూతి
సరికొత్త ఆలోచనలకు తావిస్తూ
తేటపడుతున్న మెదడు
నమ్మలేని నిజాన్ని విభ్రమిస్తూ
వేణువు రాగాలకు గాత్రధారియై ఆశీర్వదిస్తూ అమ్మమ్మ
కడలి అగాథాలకు మాట మాత్రమైనా ఆలవాలమయ్యే నవ్యతలో అమ్మ
తరాల అంతరాలకు దూరం ఈ తరం
మాటను మంత్రం చేసే సరికొత్త తరం ఈ తరం
'Give to Gain'
మనమే మనకు కావాల్సింది నేర్పి పొందాలట
యుఎన్ చెప్పిందో పాఠం
మనకు పురాకాలంగా పాతదైన సరికొత్త పాఠం
చెప్పేద్దాం
నవ తరానికి వెన్నుతట్టే
మేలైన అవకాశం
ముందు తరానికి వారధులను సిద్ధం చేద్దాం రండి మరి
