మేఘాల నీడ తప్ప
రాకెట్ బాంబుల కౌగిలి వద్దు
కిరణాల కరచాలనం తప్ప
బుల్లెట్ల స్పర్శలు వద్దు
వర్షాల తోడు తప్ప
మిలిటరీ మార్చ్ లు వద్దు
ఎంత చెప్పినా వినరేమి
అడవికి కావాల్సింది
విషపూరిత రాజకీయాలు కాదు
డాంబార్ నిండిన భూమి కాదు
సిమెంటు నిండిన గాలి కాదు
కాంక్రీట్ జలపాతాలు కానేకాదు
సూర్యచంద్రుల కాంతులు చాలు
మానవుల ప్రేమలు చాలు
మట్టి మనుషులు కొందరైనా చాలు
నదీ జలాలతో
ఏనుగు తొండాలతో
బుల్డోజర్లు గెలవలేవు
పక్షులు విలపిస్తే
నీ కుర్చీ విరిగిపోక తప్పదు
జింక పిల్లలు హృద్ఘోషతో గెంతులాడితే
నీ రాజ భవనాలకు భూకంపం తప్పదు
జిరాఫీలు తల తిప్పితే
నీ అద్దాల మేడలు అరక్షణంలో పటాపంచలు
నాగులను నాగాజాతి ప్రాణులను హింసిస్తే
ఎంతటి నవాబులకైనా
ఊపిరి దొరకదు.
నెమలి నాట్యానికి నీ హస్తాలు అడ్డుపడితే
చెట్టు వేర్లు
నీ గొంతుకు చుట్టబడతాయి జాగ్రత్త!
