ఒక తెలిసీ తెలియని వేదన
లో లోపల సుళ్లు తిరుగాడుతుంది
మనోసముద్రంలో సుడిగుండం
తుఫాన్ అయ్యి తీరాన్ని పొద్దున
నిండిన స్త్రీ మాదిరి
భారంగా దాటలేకపోతుంది
ఏకకాలంలో నూరు అశ్వాల శక్తిని
కూడా తీసుకొని గాలి వీస్తుంది
ఆకాశమంత నీళ్లను గర్భంలో
దాచుకున్న మేఘాలు
ఉరుము మెరుపుల తబలా మోగిస్తున్నాయి
అతి భారీ వర్ష సూచన
రేకుల మీద చినుకులు
వాయిస్తున్న భాజా భజంత్రీలు
వరదలు పారి వాగులు పారి
పొంగిన నదులుగా సాగి
తిరిగి తిరిగి సముద్రాన్ని
శరణుజొచ్చింది వాన
ప్రకృతిని లొంగదీసుకోవాలని మనిషి
మనిషిని అదుపు చేయాలని ప్రకృతి
ఆది నుంచి ఓకే కంచంలో తిని
ఒకే మంచంలో పడుకున్న పాత మిత్రులే కానీ
పరస్పర విరుద్ధ శత్రువులుగా మారారు
ఒకానొక బొమ్మ కట్టని
అసంపూర్ణ పద చిత్రం
పిండ రూపం లో తల్లి కడుపులో
వింత వింత చేష్టలు చేస్తున్న శిశువు
దుక్కి దున్నిన తడిసిన నేల
విత్తనాలు నాటడానికి సిద్ధమైంది
లో లోన మసిలిన విషయం సందర్భం
ఎరుకలోకి వచ్చి కాగితం మీద
కవితా అక్షరమై జన్మించింది
