జుత్తుని చెరుపుతోన్న గాలి
నా ముఖాన్ని మృదువుగా చేస్తోంది ~
బలే బావుంది. – కెవిన్ నునెల్ (7 సం.లు )
***
వాన పడుతున్న రోజు ~
గుంజ మీద చిన్న చీమ
ఎక్కుతూ..జారుతూ.. – ఎల్లిసన్ హెన్నెస్సి ( 6 సం.లు)
***
వాన సంతోషం ~
నీళ్ళ పడెలలో ఎగురుతూ
దుముకుతూ కీచురాళ్ళు – టామీ బాయ్డ్ ( 7 సం.లు )
***
ఒంటరిగా, విచారంగా
కదలక లేని కీటకం ~
వాననీళ్ళు, కన్నీళ్ళు – టాడ్ థర్బర్ ( 6 సం.లు )
***
వాన చినుకులు ముద్దాడే
పూవులు ఊగుతున్నాయి ~
ప్రేమని వర్షిస్తున్న మిన్ను – క్రిస్ డూయెమ ( 6 సం.లు )
***
కృతజ్ఞతగా తలెత్తుతున్నాయి
వికసిస్తున్న కుసుమాలు ~
ప్రకృతి కానుక వానకు – జాన్ డోరా ( 5 సం.లు ) / మిచెల్లె జెర్నిగన్ ( 7 సం.లు )
***
దివ్య సంగీతం ~
మెల్లగా పాడుతున్న గాలీ,గడ్డి గమకాలు
తూర్పుకు తేలిపోతూ – జెరిమీ మైర్స్ ( 5 సం.లు )
***
సావాసగాళ్ళ గురించి
గూడులో కలగంటూ ~
ఒక చిన్ని పిట్ట – జేసన్ కుట్నెర్ ( 5 సం.లు )
***
వెతుక్కుంటూ..ఎదురుచూస్తూ
నీలి పక్షి పిల్ల ~
నా అమ్మ ఎక్కడ ? – లెవాన్ వార్టనియన్ ( 7 సం.లు )
***
ఉరుములు ఉరుముతున్నాయి ~
తల్లి రెక్కల కింద కూన
నిర్భయంగా, నిశ్చింతగా – చికితా విల్లీస్ ( 5 సం.లు )
( ఈ హైకులు అమెరికాలోని హుస్టన్( టెక్సాస్)నగరంలో విల్‌హెల్మ్ స్కూలు పిల్లలు రాసినవి.వీరు 4 నుంచి 8 యేళ్ళ ప్రాయం కల పిల్లలు.వీరు 20 దేశాల నుంచి, 9 వివిధ మతాల నుంచి వచ్చి ఇక్కడ చదువుతున్నవారు. 1971 లో ఈ స్కూలు పిల్లల హైకులతో సంకలనం చేసిన Haiku Poetry , a children’s collection అనే పుస్తకం నుంచి నవంబర్ 14 పిల్లల దినోత్సవం సందర్భంగా ఈ హైకులు అనువాదం అందిస్తున్నాను )
