దీపావళి ప్రత్యేక కథలు – 2024 – కథలకు ఆహ్వానం

ప్రత్యేక సందర్భాలు సాహిత్యాన్ని ఉత్సాహ పరుస్తాయి. ప్రత్యేక సంకలనాలు ఎంచిన సాహిత్యాన్ని నిక్షిప్తం చేస్తాయి. తెలుగులోనే కాదు మన దేశంలోని చాలాచోట్ల 1970ల నుంచి దీపావళి ప్రత్యేక సంచికల వెలువరింత ఉంది. తెలుగులో గతంలో ఆంధ్రజ్యోతి, ఆంధ్రప్రభ, యువ, రచన, జాగృతి తదితర పత్రికలు దీపావళి ప్రత్యేక సంచికలు తెచ్చేవి. నేడు దాదాపు లేవు. కాని తమిళనాడు, మహరాష్ట్రలలో పెద్ద స్థాయిలో నేటికీ వెలువడుతున్నాయి. మరాఠిలో మే నెల నుంచి వీటి పని మొదలవుతుంది. అక్కడ దాదాపు 300 ప్రత్యేక సంచికలు వస్తాయి. ఈ నేపథ్యంలో ఆ ఆనవాయితీని ఏదో ఒక మేరకు కొనసాగించాలని ఈ ప్రయత్నం. రెండేళ్ల క్రితం ‘దీపావళి స్పెషల్‌’గా వెలువరించిన ‘తెలుగు పెద్ద కథలు’ సంకలనం విశేష ఆదరణ పొందింది. ఈసారి పెద్ద కథలు, చిన్న కథలు కూడా పరిగణనకు తీసుకోవాలని నిర్ణయం. ఈ సంకలనానికి యువ కథకుల నుంచి సుప్రసిద్ధ కథకుల వరకూ అందరూ కథలు పంపాలని విన్నపం.

ఇదీ సంకల్పం:

– శిల్పంలో తెలుగు కథ సాగించిన వికాసం, వస్తువు ఎంపికలో చూపగలిగే వివేచన ప్రధాన కొలబద్ద.

– సమకాలీన తెలుగు కథకు ఏదో మేర గీటురాయి వలే నిలువదగ్గట్టుగా ఎంపిక.

– తెలుగు కథ పట్ల పాఠకుల్లో గౌరవం కొనసాగేందుకు ఇదీ ఒక వేదికలా నిలవాలి.

కథలు పంపేందుకు సూచనలు:

– చిన్న కథ, పెద్ద కథ ఏదైనా పంపవచ్చు. 1500 పదాల నుంచి 6000 పదాల కథలైనా సరే.

– భిన్న జీవన పార్శ్వాలు, శకలాలు, పూర్ణ అనుభూతులు, అభ్యంతరాలు, కనుగొంతలు, సామాజిక స్వరూపాలు, అనుబంధాల తాజా తాహతు, అధోజగత్తులో పూసే లతలు, పరిహాసాలు, వెక్కిరింతలు… ఏదైనా కథాంశమే.

– మాండలికం రాసే రచయితలు కథంతా మాండలికంలో రాయవచ్చు కాని పాత్రల సంభాషణలకు మాత్రమే మాండలికం పరిమితం చేస్తే అంతే ‘వేరు’ స్వభావాన్ని చూపవచ్చు.

– కథ పూర్తిగా యూనికోడ్‌లో టైప్‌ చేయించి ప్రూఫ్‌ చూసుకుని పంపాలి. సంభాషణలకు తప్పనిసరిగా సింగిల్‌ కోట్‌ ‘ ’ మాత్రమే వాడాలి. ‘‘ ’’ డబుల్‌ కోట్‌ ఉండరాదు.

– కథలు అందడానికి ఆఖరు తేది సెప్టెంబర్‌ 1, 2024.

– నవంబర్‌ మొదటివారంలో హైదరాబాద్‌లో ఆవిష్కరణ. రెండు రాష్ట్రాల్లో వివిధ చోట్ల పరిచయ సభలు. సంకలనంలో కథలపై చర్చ. విమర్శనా వ్యాసాలు.

– రేపటి నుంచే మీ కథలు పంపవచ్చు. deepavalikatha24@gmail.com

నమస్కారాలతో
మహమ్మద్‌ ఖదీర్‌బాబు