పున్నమి రాత్రుల ప్రయాణాలలో మనతోపాటు ప్రయాణించే చందమామలా ఎప్పుడూ ఒక నిఘాకన్ను మన వెన్నంటే వుంటుంది , . వధ్యశిలమీద నిలబెట్టినపుడల్లా నిందారోపణల సాక్ష్యాల కోసం మన బంధుగణం , మిత్రబృందంలోనే కోవర్టులు నియమించబడతారు . ప్రతి మాటా రకరకాల విపరీతార్ధాలతో చేరిపోతూ వుంటుంది. . ఫోన్స్ కి రహస్యపు స్పీకర్లు అమర్చబడి వుంటాయి మాటాడే ప్రతిమాటా రికార్డు చేయబడుతుంది సౌండ్ మిక్సింగుల ఎడిటింగులతో తయారయిన కంటెంట్ నిశ్శబ్ధంగా ఒక ఫోల్డర్‌లో దూరిపోతుంది. . నేరారోపణ రుజువుచేయుటకోసం మనకోసమొక తెహల్కా డాట్‌ కామే స్పృష్టింబడుతుంది. మన ప్రతి చర్య పైనా దర్శకత్వపు ప్రతిభతో డాక్యుమెంటరీ తయారుచేయబడుతుంది . అవసరమయినప్పుడు ట్రంపుకార్డులా బయటకు తీయడానికి మనం మాట్లాడేమాటలన్నీ మస్తిష్కపు పొరల్లో ఎటూ బద్రపరచబడి వుంటాయి . . పూర్తిగా అవసరాలు తీరిపోయి వట్టిపోయిన గోవులా మారిపోయిన మరుక్షణం మనమీద ఫైనల్ ఛార్జ్ షీట్ ప్రిపేరవుతుంది . మనకే తెలియని మన విషయాలు వాటికి ఆపాదించబడిన అర్ధాలు, చూసి ఆశ్చర్యపోతుండగానే అంతిమతీర్పు వెలువడుతుంది, . మనకోసం ఒక న్యాయస్థానం కల్పించగలిగినపుడు మాత్రమే మనమేదైనా నిరూపించుకోగలమని అర్ధమయ్యాక, ఇక అప్పుడు .. మెడ వెనుక వెన్నుపూస విరిగే శబ్ధం కోసం ఎదురుచూడడమొక్కటే మనం చేయవలసింది.
